Tumbe Group of International Journals

Full Text

ಲಾಕ್‌ಡೌನ್ : ಬದುಕು ಕಟ್ಟಿಕೊಳ್ಳಲು ಹಂಬಲಿಸಿದ ಮಹಿಳೆಯರ ಯಶೋಗಾಥೆಗಳು

ಮಂಜುನಾಥ

ಸಂಶೋಧನಾರ್ಥಿ, ಸಮಾಜಶಾಸ್ತ್ರ ವಿಭಾಗ,

ಕನ್ನಡ ವಿಶ್ವವಿದ್ಯಾಲಯ, ಹಂಪಿ - ೫೮೩ ೨೭೬.

manjuuppar661996@gmail.com

‘ಪುಗಿಲು’(Introduction)

ಪ್ರಾಚೀನ ಭಾರತೀಯ ಸಮಾಜಗಳ ಮನುಸ್ಮೃತಿದಲ್ಲಿ ಹಾಗೂ ಸ್ವತಂತ್ರ ಭಾರತದ ಸಂವಿಧಾನದಲ್ಲಿ ಹೊರತಳ್ಳಲ್ಪಟ್ಟಿರುವ ಮತ್ತು ಅದರ ವ್ಯಾಪ್ತಿಯ ಅಂಚಿನಲ್ಲಿರುವ ಕಾರ್ಮಿಕರು, ದಲಿತರು, ಅಲ್ಪಸಂಖ್ಯಾತರು, ಮಹಿಳೆಯರು, ಅಲೆಮಾರಿ ಮತ್ತು ಅರೆ ಅಲೆಮಾರಿಗಳು, ರೈತರು ಮತ್ತು ಮಕ್ಕಳು ಮೊದಲಾದವರನ್ನು ಭಾರತ ಸಂವಿಧಾನದ ಚೌಕಟ್ಟಿನ ಒಳಗೆ ತರಲು ಸರ್ಕಾರಿ ಮತ್ತು ಸರ್ಕಾರೇತರ ಸಂಸ್ಥೆಗಳು ಸಾಂಘಿಕವಾಗಿ ವಿವಿಧ ಯೋಜನೆಗಳು ಮತ್ತು ಕಾರ್ಯನೀತಿಗಳ ಮೂಲಕ ಶ್ರಮಿಸಿದವು. ಸರ್ಕಾರದ ಮಟ್ಟಿಗೆ ಅಂತಹ ಪ್ರಯತ್ನಗಳಲ್ಲಿ ‘ಮಹಾತ್ಮ ಗಾಂಧೀ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆ’ಯು ಕೂಡ ಒಂದು. ಗ್ರಾಮೀಣ ಬಡತನದ ಬೇರನ್ನು ಅಲುಗಾಡಿಸುವ ಉದ್ದೇಶದಿಂದ ಈ ಯೋಜನೆಯು ಕಾರ್ಯರೂಪಕ್ಕೆ ತರಲಾಯಿತು. ಇಂತಹ ಯೋಜನೆಯು ಮಹಿಳೆಯರ ಬದುಕಿನಲ್ಲಿ ಯಾವ ರೀತಿಯಲ್ಲಿ ಪ್ರಭಾವಿಸುತ್ತದೆ ಎಂಬುದನ್ನು ತಿಳಿಯುವುದಕ್ಕಿಂತ ಮುಂಚೆ ಮಹಿಳೆಯರ ಕುರಿತ ನನ್ನ ಗ್ರಹಿಕೆಯನ್ನು ಸ್ಪಷ್ಟಪಡಿಸುವುದು ಸೂಕ್ತ. ಮಹಿಳೆಯ ಇನ್ನೊಂದು ಹೆಸರೇ ದುಡಿಮೆ. ಅವಳು ಯಾವತ್ತೂ ದುಡಿಯದೆ ಉಂಡವಳಲ್ಲ. ಅವಳು ದುಡಿಮೆಯನ್ನೇ ತನ್ನ ಅಸ್ತಿತ್ವ ಮತ್ತು ಗುರಿಯನ್ನಾಗಿಸಿಕೊಂಡಿದ್ದಾಳೆ. ಆದರೆ ಅವಳ ಬಗ್ಗೆ ಕುಟುಂಬದೊಳಗಿನ ಹಾಗೂ ಸಮಾಜದೊಳಗಿನ ಮೌಲ್ಯಗಳು ಬದಲಾಗಿಲ್ಲ. ಅವಳು ಇದ್ದ ನೆಲೆಯಲ್ಲಿಯೇ ತನ್ನನ್ನು ಸಂಘರ್ಷಕ್ಕೆ ಒಡ್ಡಿಕೊಳ್ಳುತ್ತಾ, ಬದುಕುಳಿಯುತ್ತಾ, ತನ್ನ ಐಡೆಂಟಿಟಿಯನ್ನು ಗಟ್ಟಿಗೊಳಿಸುತ್ತಾ ಮತ್ತು ಜೀವನೋಲ್ಲಾಸವನ್ನು ಕಾಪಿಟ್ಟುಕೊಳ್ಳುವ ಪರಿ ಎಲ್ಲರನ್ನೂ ಬೆರಗು ಮೂಡಿಸುವಂತಹದ್ದು. ‘ಮಹಾತ್ಮ ಗಾಂಧೀ ರಾಷ್ಟ್ರೀಯ ಉದ್ಯೋಗ ಖಾತರಿ ಯೋಜನೆ’ಯು ಇಂತಹ ಅಸಂಖ್ಯ ಕಿರಿಯ ಮತ್ತು ಹಿರಿಯ ಜೀವಗಳು ಹಳ್ಳ-ಕೆರೆಯಂಗಳದಲ್ಲಿ ಮತ್ತು ಸಾರ್ವಜನಿಕ ಆಸ್ತಿ-ಪಾಸ್ತಿಗಳಲ್ಲಿ ಅನುಭವಿ ಪ್ರಬುದ್ಧ ಶ್ರಮಿಕ ನಕ್ಷತ್ರದಂತೆ ಹೊಳೆಯುವ ಹಾಗೆ ಮಾಡಿದೆ. ಈ ಯೋಜನೆಯು ಕಲ್ಯಾಣ ಕರ್ನಾಟಕದ ಭಾಗದಲ್ಲಿ ಹೇಗೆ ಫಲಿತವಾಗಿ ರೂಪುಗೊಂಡಿದೆ, ಫಲಾನುಭವಿಗಳ ಬದುಕಿಗೆ ಆಧಾರವಾಗಿ ನಿಂತಿದೆ ಎಂಬುವುದನ್ನು ಕೊಪ್ಪಳ ಜಿಲ್ಲೆಯ ಕುಕನೂರು ತಾಲೂಕಿನ ಶಿರೂರು ಗ್ರಾಮಪಂಚಾಯಿತಿಯ ವ್ಯಾಪ್ತಿಗೆ ಬರುವ ಬೆದವಟ್ಟಿ ಗ್ರಾಮದಲ್ಲಿನ ಮಹಿಳೆಯರನ್ನು ಪ್ರಕರಣ ಅಧ್ಯಯನದ ಮೂಲಕ ಮಾಹಿತಿ ಪಡೆದುಕೊಂಡು ತಿಳಿಯಪಡಿಸುವ ಪ್ರಯತ್ನ ಮಾಡುವುದಾಗಿದೆ. ಅದಕ್ಕಾಗಿ ಪುಗಿಲು (Introduction), ಉದ್ದೇಶಗಳು (Objectives), ವ್ಯಾಪ್ತಿ (Scope), ವೈಧಾನಿಕತೆ (Methodology), ಫಲಿತಗಳು (Results), ಕಡೆನುಡಿ (Conclusion), ಪರಾಮರ್ಶನ ಸಾಹಿತ್ಯ (Reference literature) ಮೊದಲಾದ ಅಂಶಗಳ ಮೂಲಕ ಲೇಖನದ ಒಟ್ಟು ಸಾರವನ್ನು ಕಟ್ಟಿಕೊಡಲು ಪ್ರಯತ್ನಿಸುತ್ತೇನೆ.

ಪ್ರಾತಿನಿಧಿಕ ಪದಗಳು (Keywords): ಲಾಕ್‌ಡೌನ್, ಮಹಾತ್ಮ ಗಾಂಧೀ, ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆ, ಮಹಿಳೆ.

ಉದ್ದೇಶಗಳು (Objectives)

೧) ಮಹಿಳೆಯರ ಹೋರಾಟದ ಬದುಕಿನ ನೆಲೆಗಳನ್ನು ಶೋಧಿಸುವುದು.

೨) ಮಹಾತ್ಮ ಗಾಂಧೀ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆಯ ಫಲಿತತೆಯನ್ನು ಶೋಧಿಸುವುದು.

ವೈಧಾನಿಕತೆ (Methodology)

ಪ್ರಸಕ್ತ ಲೇಖನದ ತಾತ್ವಿಕತೆಯನ್ನು ಕಟ್ಟಿಕೊಡಲು ಅನುವಾಗುವಂತಹ ಮಾಹಿತಿಯನ್ನು ಸಂಗ್ರಹಿಸಲು ‘ಏಕವಿಷಯಕ ಅಧ್ಯಯನ ವಿಧಾನ’ ಬಳಸಿಕೊಂಡಿರುತ್ತೇನೆ. ಅದರಲ್ಲಿಯೂ ಏಕವಿಷಯಕ ಅಧ್ಯಯನಕ್ಕಾಗಿ ಮಹಿಳೆಯರನ್ನು ಆಯ್ಕೆ ಮಾಡಿಕೊಳ್ಳುವಾಗ ‘ಉದ್ದೇಶಿತ ಮಾದರಿ’ಯನ್ನು ಬಳಸಿಕೊಂಡು (ವಿಜಯಲಕ್ಷ್ಮೀ ಇವರು ೫ನೇ ತರಗತಿಯವರೆಗೆ ಮಾತ್ರ ಓದಿರುತ್ತಾರೆ. ತಿಪ್ಪವ್ವ ಈಕೆಯು ಹೂವು ಮಾರಾಟ ಮಾಡಿ ಜೀವನ ನಡೆಸುವವಳು. ರೇಣವ್ವ ಚಹಾದ ಅಂಗಡಿ ನಡೆಸುವವಳು ಹೀಗೆ ಬೇರೆ ಬೇರೆ ಕೆಲಸಗಳನ್ನು ಮಾಡುವ ಮಹಿಳೆಯರನ್ನು ಪ್ರಕರಣ ಅಧ್ಯಯನಕ್ಕೆ ಆಯ್ಕೆ ಮಾಡಿಕೊಂಡಿರುತ್ತೇನೆ) ವಿವರಣಾತ್ಮಕ ವಿಧಾನದ ಮೂಲಕ ಈ ಲೇಖನವನ್ನು ಸಿದ್ಧಪಡಿಸಿರುತ್ತೇನೆ.

ಸಂಶೋಧನೆಯ ವ್ಯಾಪ್ತಿ (Scope of the Research)

ಈ ಮೇಲೆ ಹೇಳಿರುವಂತೆ ಪ್ರಸ್ತುತ ಲೇಖನದ ರಚನೆಗಾಗಿ ನಾನು ಕೊಪ್ಪಳ ಜಿಲ್ಲೆಯ ಕುಕನೂರು ತಾಲೂಕಿನ ಶಿರೂರು ಗ್ರಾಮಪಂಚಾಯಿತಿಯ ವ್ಯಾಪ್ತಿಗೆ ಬರುವ ಬೆದವಟ್ಟಿ ಗ್ರಾಮದಲ್ಲಿನ ಮಹಿಳೆಯರನ್ನು ಪ್ರಕರಣ ಅಧ್ಯಯನದ ಮೂಲಕ ಮಾಹಿತಿ ಪಡೆದುಕೊಂಡಿರುತ್ತೇನೆ. ಅದರಲ್ಲಿಯೂ ವಿವಿಧ ವೃತ್ತಿಗಳಲ್ಲಿ ತೊಡಗಿರುವ ಕೇವಲ ೫ಜನ ಮಹಿಳೆಯರನ್ನು ಮಾತ್ರ ಆಧಾರವಾಗಿಟ್ಟುಕೊಂಡು ಲೇಖನವನ್ನು ರಚಿಸಿದ ಕಾರಣಕ್ಕಾಗಿ ಈ ಎರಡು ಅಂಶಗಳೇ ನನ್ನ ಸಂಶೋಧನಾ ವ್ಯಾಪ್ತಿಯನ್ನು ಸೂಚಿಸುತ್ತವೆ.

ಈ ಭಾಗದ ‘ಉದ್ಯೋಗ ಖಾತರಿ ಯೋಜನೆ’ಯ ಸಂಕ್ಷಿಪ್ತ ಅಂಕಿಅಂಶಗಳು

ಈ ಯೋಜನೆಯು ಕಲ್ಯಾಣ ಕರ್ನಾಟಕದ ಭಾಗದಲ್ಲಿ ಹೇಗೆ ಫಲಿತವಾಗಿದೆ. ಫಲಾನುಭವಿಗಳ ಬದುಕಿಗೆ ಆಧಾರವಾಗಿ ನಿಂತಿದೆ ಎಂಬುವುದನ್ನು ಕೊಪ್ಪಳ ಜಿಲ್ಲೆಯ ಕುಕನೂರು ತಾಲೂಕಿನ ಶಿರೂರು ಗ್ರಾಮಪಂಚಾಯಿತಿಯ ವ್ಯಾಪ್ತಿಗೆ ಬರುವ ಬೆದವಟ್ಟಿ ಗ್ರಾಮದಲ್ಲಿನ ಮಹಿಳೆಯರನ್ನು ಪ್ರಕರಣ ಅಧ್ಯಯನದ ಮೂಲಕ ಮಾಹಿತಿ ಪಡೆದುಕೊಂಡು ತಿಳಿಯಪಡಿಸುವ ಉದ್ದೇಶವನ್ನು ಈ ಬರೆಹವು ಹೊಂದಿದೆ. ಅದಕ್ಕಿಂತ ಮುಂಚೆ ಶಿರೂರು ಗ್ರಾಮ ಪಂಚಾಯತಿಗೆ ಸಂಬಂಧಿಸಿದಂತೆ ‘ಉದ್ಯೋಗ ಖಾತರಿ ಯೋಜನೆ’ಯ ಸಂಕ್ಷಿಪ್ತ ಅಂಕಿಅಂಶಗಳ ವಿವರವನ್ನು ನೋಡಬಹುದಾಗಿದೆ.

ಶಿರೂರು ಗ್ರಾಮ ಪಂಚಾಯಿತಿಯ ವ್ಯಾಪ್ತಿಯಲ್ಲಿ ಬರುವ ‘ಮಹಾತ್ಮ ಗಾಂಧೀ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆ’ಲ್ಲಿ ಉದ್ಯೋಗ ಚೀಟಿಗಳ ನೋಂದಾಯಿತ ಸಂಖ್ಯೆ ಮತ್ತು ದುಡಿಯುವ ವ್ಯಕ್ತಿಗಳ ಸಂಖ್ಯೆಯ ಕೋಷ್ಠಕ

ಕ್ರಮ ಸಂಖ್ಯೆ	ಗ್ರಾಮಗಳು	ಉದ್ಯೋಗ ಚೀಟಿಗಳ ಸಂಖ್ಯೆ	ವ್ಯಕ್ತಿಗಳು
೦೧	ಅರಕೇರಿ	೪೧೯	೧೬೪೨
೦೨	ಬೆದವಟ್ಟಿ	೩೯೨	೧೩೯೭
೦೩	ಚೆಂಡೂರು	೪೭೩	೧೬೦೫
೦೪	ಶಿರೂರು	೭೩೦	೨೭೩೯
೦೫	ಯಡಿಯಾಪುರ	೬೦೪	೨೧೮೮
	ಒಟ್ಟು	೨೬೧೮	೯೫೭೧