ಉಬ್ಬಿತಯ್ಯ ಕೊಬ್ಬಿತಯ್ಯ ಕರಿಯ ಕೋಣ
ಡಾ. ಶಿವಲಿಂಗಮೂರ್ತಿ
ಮುಖ್ಯಸ್ಥರು, ಕನ್ನಡ ವಿಭಾಗ,
ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು, ತುಮಕೂರು.
ಉಬ್ಬಿತಯ್ಯ ಕೊಬ್ಬಿತಯ್ಯ
ಸೊಕ್ಕಿದಂತ ಕರಿಯ ಕೋಣ
ಮಂದಿ ಕೇಕೆ ಹಾಕುವಾಗ
ಬಾಲಬೀಸಿ ಕತ್ತು ಕುಣಿಸಿ
ಗುದ್ದಿಗುದ್ದಿ ಕೊಂಬು ಹಣೆಗೆ
ಮಣ್ಣು ಮೆತ್ತಿಕೊಂಡಿತಯ್ಯೋ ||ಉಬ್ಬಿತಯ್ಯ||
ಹೊಲಸು ಮೂಸಿ ಹಿಗ್ಗಿ ತಾನು
ನೆಲವು ಕುಸಿಯೆ ಕುಣಿದು ಕುಣಿದು
ಪೊದರು ಮೆಳೆಯ ನುಗ್ಗಿತಯ್ಯ
ಸೊಕ್ಕಿನಿಂದ ಕರಿಯಕೋಣ ||ಉಬ್ಬಿತಯ್ಯ||
ಅಲ್ಲಿ ಇಲ್ಲಿ ನೀರು ಬಾನು
ಇದರ ಬಿಂಬ ತೋರಿತಯ್ಯ ||ಉಬ್ಬಿತಯ್ಯ||
ಹಿಡಿಹಿಡಿ ಮೇವು ಹಾಕಿ
ಮಯ್ಯ ತೊಳೆದು ನುಣುಪು ಮಾಡಿ
ಬೆನ್ನ ತಟ್ಟಿ ಕೊರಳ ಮುಟ್ಟಿ
ಭಲೇ ಭಲೇ ಎನುತ ಮಂದಿ
ಕಾಣದಂತೆ ಮಚ್ಚು ಮಸೆದು
ಮಾರಿಜಾತ್ರೆ ಕಾಯುತಿಹರೊ ||ಉಬ್ಬಿತಯ್ಯ||
ತನ್ನ ತಾ ಅರಿಯದ ಕೋಣ
ಮುಖ ಸ್ತುತಿಗೆ ಮರುಳಾಗಿ
ಕಾಳ ಕತ್ತಲೆಯೊಳಗೆ ಕರಗಿ
ಕುರುಹು ಇರದೆ ಹೋಯಿತಯ್ಯೊ ||ಉಬ್ಬಿತಯ್ಯ||